留民料理

Open Now

Now Closed

隨着電影幻愛嘅熱潮，最近都多咗人討論屯門區嘅好去處，而置樂不嬲都充滿着好多不同嘅美食，今次嚟到呢間係之前都有媒體報道過嘅留民料理。門口沒有華麗的裝修，格局似一般平民食堂，以一塊發光的招牌為亮點，主打以日本菜式為主打的fusion菜，帶出一種日本街邊的居酒屋感覺。店內嘅環境以樸素為主，擺設同埋店內嘅裝飾都有種住家嘅感覺，沒有過分包裝嘅餐牌同埋裝修，反而令食客有一種親切感。店員好好咁推介我哋食啲乜嘢好，前菜首先點左一客沖繩海葡萄。反而之前自己去過沖繩但都未特別去嘗試呢款當地嘅特產，適逢而家疫情冇得去旅行，都算係一個好機會第一次試呢種沖繩特色食品。食落味道相當唔錯，帶著微微嘅鹹味再加上一粒粒特別嘅質感，難怪叫海葡萄。然後店員都推介左BB乳鴿，亦係佢哋店入邊嘅名物，果然相當美味，乳鴿都算有肉地，亦唔會太韌，食落似係瑞士汁嘅醬汁調得好之餘亦都相當入味，細細隻食落啱啱好，難得喺日式為主嘅餐廳食到相較為中式既乳鴿菜式。緊接下來嘅係椒鹽鮑魚，平時食海鮮食鮑魚多數都係清蒸再配豉油汁蔥花既食法，以椒鹽嘅方式去整鮑魚都算幾新穎，賣相已經十分吸引，而廚師都有心咁將鮑魚唔食得嘅部位都切除，方便食客可以一口咁食。