City Café

喺普天同慶嘅聖誕節最能夠感受節日氣氛莫過於食自助餐, 無論裝飾擺設現場氣氛都可以令人沉醉於其中.

今次多謝公關朋友嘅邀請, 可以率先嚐試多個特別為普天同慶嘅聖誕而設計嘅新菜式.

首先品嚐節慶美食係法式鵝肝醬配香檳紅桑子啫喱杯, 法式鵝肝肝味濃郁, 因為冇煎過, 入口比較軟淋, 同較硬身嘅多士加上清新味道嘅香檳紅桑子啫喱十分配合.

法式鵝肝醬配香檳紅桑子啫喱杯

至於北海道原粒帶子就用上他他方法配上切碎北海道帶子粒同龍蝦粒芒果粒再伴上無花果, 令整道菜式鮮味更為提升, 係清爽開胃嘅前菜.

北海道帶子龍蝦他他伴無花果

法式烘龍蝦米多用上白蘭地同白菌忌廉汁爆香波士頓龍蝦, 燴熟龍蝦後再伴以香甜荷蘭汁焗至金黃, 大人小朋友都會鍾意食. 根據公關資料, 每位客人品嚐海鮮龍蝦自助晚餐都會獲贈一客.

法式烘龍蝦米多

堂煮歐鰈魚三文魚配螄魽紅花汁, 呢個菜式喺自助晚餐會即叫即煮, 歐鰈魚係可持續發展海鮮, 包著鮮三文魚, 淋上螄魽西藏紅花汁, 鮮味更為提升.

堂煮歐鰈魚三文魚配螄魽紅花汁

慢煮火雞肉好配合聖誕節享用, 火雞肉用慢煮方法烹調可以鎖著肉汁, 入口肉質非常細嫩. 再襯上雜果如士多啤梨, 紅莓, 紅桑子, 少許橙汁, 清新開胃.

慢煮火雞肉

至於甜品方面, 今次有矜貴Movenpick雪糕crossover近期大熱法式芝士流心撻, 雪糕內士多啤梨果肉正好中和芝士流心撻厚重. 口感一冷一熱, 滋味無窮.

1

Movenpick雪糕crossover法式芝士流心撻

另一款甜品朱古力芒果心太軟, 朱古力心太軟內有芒果槳流心, 芒果酸甜味正好中和濃濃朱古力蛋糕味, 朱古力迷一定喜愛.

朱古力芒果心太軟