又到每月一次分行嘅聚會，我地又係有$500可以食咗佢，真happy。不過諗去邊度食呢餐嘅責任又落在我身上，真係仲難過揀股票買，有人唔食呢樣，有人唔食嗰樣。終於比我搵到....就係連我自己都好耐冇食過嘅韓國燒烤。
根住又要揀地點，原來火車沿線最近已經要出返旺角至有得食，不過唔緊要，因為今日我下晝放假，可以預早去霸位，差不多18:30我已去到攞位，1號飛...知客小姐話19:00前返去就冇問題。
我19:00返去，佢開咗個位比我，還掂又係任食，而佢地又未到，唯有食住等，叫咗啲前菜同食物，自已燒住先。我地都食咗好多嘢，肥牛係我地最鍾意嘅，叫咗好多碟，但係最後發覺原來我同事Sky至係最刷得嘅，我地停哂口，佢仍然可以繼續自己一個人食多三碟。
評語：可以一食，只係好普通嘅燒烤，選擇唔係太多，但係就極之適合好食肉嘅人士，嘢飲亦唔係貴，我地五個男仔去，每人都係$140，都唔算貴，而且唔使自己出去攞嘢食，好似茶樓叫點心咁，雖然冇寫時限，但到了21:00已叫我地埋單，不過其實已經食咗個半鐘有多，再多時間我地都食唔落。
