鐵板燒海賀

Open Now

Now Closed

餐廳攞過好多飲食獎項，空間感好夠之餘，座位編排亦有私隱度，最重要係望住維港。鐵板鮑魚套餐、鐵板海鮮套餐食材勁新鮮，見到隻南非鮑魚仲好有活力咁樣喺度郁緊，師傅首先處理咗大蝦先，用蝦膏煮返入個醬，個蝦頭處理得勁惹味，隻蝦身都好大隻爽滑彈牙，之後配埋個多士連埋個汁一齊食，超級好味。帆立貝勁creamy，配埋下低個薯蓉醬汁，入口超重海水味，材料新鮮食落好鮮甜。望住師傅新鮮處理鮑魚，同埋切咗格仔紋燒得勁靚。入口勁嫩滑口感一流，鮑魚醬汁勁鮮味，每食一口都好有驚喜，鮑魚肝一定要食埋，我自己勁鍾意。銀雪魚勁香魚油煎到金黃色，魚皮亦煎得勁香口，會有少少骨食嗰陣時要小心，另外伴碟有個蘋果蓉，食落去勁清新，酸酸甜甜，我都幾鍾意。美國牛柳好重肉味，配埋師傅推介嘅忌廉醬，入面有少少植物嘅根莖，我好鍾意呢個醬配埋牛柳食味道好有層次，另外個蕃茄都超級好食。仲有味噌湯，同埋漬牛蒡蕎頭。炒飯炒得超香，炒到一粒粒同埋勁乾身，我就比較鍾意食和牛炒飯。鮑魚套餐包埋半自助餐區，凍盤有三款，分別係蝦、翡翠螺、同埋青口，煙燻三文魚同埋蜜瓜火腿，仲有好多熱食同埋蛋糕，都好多選擇。