真係有驚喜！果日行街行到攰，上到4樓搵食，
見到「綠茶餐廳」開到去呢度，一於捧場！
綠茶集團好出名，全國好多分店
近年打入香港，最近仲搵左米芝蓮星級大師去打造新菜式
以創新手法演繹傳統風味
首先，1人1 茶位，叫咗「九曲紅梅」，茶色紅亮，飲落甘香順喉，唔會澀口
朋友嗌咗杯「荔枝冰爽茶」，
重點係隻茶茶小bear，可愛到爆！
甜度適中，荔枝味天然唔假，
冰涼解渴，啱晒而家咁悶熱嘅天氣。
頭盤上枱嘅「鮑魚小炒肉」真係正！有火煮住！
鮑魚仔爽口彈牙，唔會韌，仲要好入味。
小炒肉肥瘦適中，爆炒得夠鑊氣，
醬汁濃郁但唔會過鹹，送飯真係無得輸。
雖然唔係用咩名貴鮑魚，但以呢個價錢有咁嘅質素，絕對交足功課！
跟住個「香炒菜心」都好出色。
菜心翠綠爽甜，蒜香味十足又唔油膩，
簡單一道蔬菜都炒得有心機，證明師傅手勢唔錯。
主食叫咗「蕭山蘿蔔乾炒飯」，
一上枱就聞到好香！蘿蔔乾鹹香脆口，
同蛋碎、蔥花一齊炒，飯粒乾身分明，
味道豐富又唔會太濃，就算單食都唔覺滯。
細細哋一碟但夠三四人每人分到一碗，抵讚！
不得不提佢哋嘅「喉口鮮肉包」，
一籠5隻，包身鬆軟，
咬開熱辣辣，豬肉餡鮮美又唔膩，質素KEEP得住！
最後甜品試咗「筆墨酥香」，造型夠晒古雅！
呢款係以文房四寶為靈感的打卡必點甜品，好適合我地呢D文青，
外層酥化，內裡是微甜的豆蓉
香濃唔過甜，點一點「墨汁」（朱古力醬），
好風雅呀！滿足感爆棚！
環境舒服，食物有特色又抵食，
下次行開旺角，一定會再encore！
食左乜：
茶位：九曲紅梅
飲品：荔枝冰爽茶
小菜：
1.鮑魚小炒肉
2.香炒菜心
3.蕭山蘿蔔乾炒飯
4.喉口鮮肉包
甜品：筆墨酥香
餐廳：綠茶餐廳
地址：旺角亞皆老街8號朗豪坊4A樓15-17號舖
