牛之鍋

Open Now

Now Closed

今晚應該係2020年最後一晚可以堂食晚餐，所以就揀咗呢間放題，唔使諗想食幾多就寫幾多。而且呢間喺港島區來講價錢真係比較實惠。佢呢度除咗火鍋放題之外仲有啲日式炸物，刺身同壽司，一個價錢可以滿足晒你唔同嘅願望。同時亦都滿足到啲酒鬼，因為呢度除咗普通飲品任飲之外仲有自由斟啤酒。火鍋配料除咗畫紙之外，仲可以出邊任攞蔬菜類，佢嘅種類都幾多。湯底我自己揀咗蟲草花松茸，就咁睇落真係好足料，用嚟淥菜都好清甜。係開始打邊爐之前，我哋叫咗少少刺身嚟食，佢啲刺身都幾新鮮。另外有試吓佢啲天婦羅炸物，都幾多嘢揀下㗎。打邊爐當然唔少得牛肉啦，佢啲極上牛真係幾瘦，一啲都唔肥，佢又切得夠薄，點淥都唔會韌。而佢啲羊肉都唔差，只係有少少騷味。另外佢呢度仲有一啲海鮮俾你揀，有我最鍾意食嘅蝦，我仲有一種我未食過嘅迷你扇貝。而佢呢度竟然仲有鴨血添，啲鴨血索晒個湯都好好食喎。食放題，要瘋狂食甜品是常識吧。但係佢呢度好值得欣賞嘅係每一樣野都係細細兜，啱晒我呢種眼闊肚窄乜都想試嘅人。而我覺得最正嘅係佢哋嘅燒菠蘿，啲菠蘿都幾清甜，而且燒得好乾身，以呢個價錢來講可以食到咁多野真係幾唔錯。