夢工房西日料理 (Closed)

今日收工約了同事出葵芳新都會廣場行街，同事話想食放題，原本打算搭車出旺角，但又唔想走嚟走去，於是上網搜尋一下，發現附近有間食放題的夢工房西日料理，gogogo一於去試下。首先梗係食刺身，種類都幾多，除咗常見嘅三文魚 甜蝦 希靈魚 象拔蚌...等刺身之外，仲有少見嘅三文魚腩同甘鳥貝刺身，質素尚算新鮮。象拔蚌食落好爽口，甜蝦鮮甜美味， encore係常識吧。壽司都有好多選擇， 全部細細件容易入口，最欣賞黑松露帶子同花之戀壽司，夠晒新鮮味道唔錯。燒羊架出乎意料之外好味，沒有羊羶味，羊架燒至剛剛熟，入口軟嫩，加上醃醬甜中帶辣，香口惹味，抵讚。黃金燒蠔size大細不均，不過~芝士香味同蠔的鮮味配合得宜，水準唔錯。天婦羅做得出色，唔會太厚炸粉，熱食最好味。叉燒拉麵，肉片偏薄和肉味較淡，反而烏冬Q彈牙，加上湯底清甜不油膩，味道尚可。呢度仲提供好幾款前菜小食同沙律，例如芝麻八爪魚同螺肉，我們超鍾意食。百多元就食到咁多美食都不俗呀。