+886 台味飯桌仔 (Closed)

最愛台式小食，尤其係夜市，真係可以食過不停～而家香港都好多台式舖頭，今日入大圍接老細收工，就搵到間幾骨子嘅台式小食店，梗係要試下啦！！主食梗係要叫牛肉麵啦～不過既然呢間有我至愛嘅冬粉，就叫個紅燒牛肉冬粉！！原來佢仲有好多湯底可以揀…麻辣呀～胡麻呀～真係任君選擇！！除咗平時食開嘅台灣香腸，仲有好多唔同嘅嘢可以揀……無骨鹽酥雞：雞肉外脆內嫩，灑少少淮鹽真係好惹味！！旗津黑輪片：黑輪片即係魚肉片，不過比較薄身，炸完幾彈牙，醃製得幾好味！月亮蝦餅：之前響第二間都食過，係用春捲皮定餃子皮夾住啲蝦膠嚟炸，呢度嘅比較大塊，但係就薄身啲，所以好脆口！蝦膠夠彈牙～爽口～點泰式甜辣醬好好味！！台南海鮮卷：有啲似潮式肉捲，不過入面包嘅係墨魚膠同蝦膠，仲有啲細細粒嘅墨魚肉，又係好香口！台式飲品梗係唔少得啦！！我不嬲飲開奶綠，少甜少冰，個綠茶味好出，少少澀口，但我鍾意！老細要台式奶茶，但係唔係跟波霸珍珠，反而跟紅豆蓉，一樣咁好味！呢度價錢經濟實惠，食到飽飽肚都所費無幾，難怪坐一陣就全場爆滿，仲有人響門口等位添！