Jimmy's Kitchen 老字號英國菜有近百年歷史，最初在上海開店，1928年後遷移至香港，但在疫情時停業，舊年終於在中環畢打行閣樓重新開業，絕對系一間殿堂級老牌西餐廳。
現代感嘅裝修，但仍保留傳統風味。溫馨又古典的胡桃木與淺木色牆板，令人好似時光倒流重回當年，餐廳仲設有開放式廚房吧枱，可以望住大廚用心烹調。
是晚我挑戰咗食蝸牛，之前成日去法國都冇試過，今次真係成就解鎖，佢哋嘅法式焗蝸牛（香草牛油焗田螺）系經典必試菜式之一。以濃郁嘅蒜香牛油包裹著飽滿的田螺，加上細膩綿滑嘅馬鈴薯蓉。
超級經典嘅基輔炸雞卷（Chicken Kiev），炸至金黃酥脆的雞腿肉，外皮香脆而不油膩，雞肉內裡多汁嫩滑。輕輕切開雞肉，竟噴發蒜香牛油汁，勁juicy。伴碟有豐富奶油薯蓉系我最愛，與雞肉好夾。
值得一提餐前CORN BREAD 質地鬆軟又嫩滑，仲好有彈性，濃郁牛油香，食到粟米粒粒，相當好味。
安格斯牛肉碎多士都係招牌菜式，豐富嘅牛肉碎鋪滿多士，牛肉充滿鹹香，多士勁酥脆，配上忌廉薯蓉，賣相都好出色。
經典法式洋蔥湯到鮮味十足，湯底味道層次好豐富，焦糖洋蔥融入湯中，濃郁嘅鮮甜同陣陣奶香輕輕滲出。
西班牙海鱸魚，新鮮得嚟仲保持嫩滑，魚皮薄脆，魚肉嫩滑。
