龍城冰室

Open Now

Now Closed

放工搵地方食晚飯，明知出街食就一定「濃味野」居多，無奈實在太懶，唔想自己煮嘅關係，最後揀咗龍城冰室醫肚。印象中既龍城冰室性價比係幾高，食物款式又多，要中餐有中餐，要西餐有西餐，再加多個Hong Kong Style畀你揀😂！一到夜晚食飯時間，例牌坐爆！家庭客亦特別多！翻開餐牌，今日突然之間想食得清淡啲，左揀右揀，最後決定叫個海鮮雜菜煲。佢仲可以加$10轉套餐，配白飯或者熱飲，但係係啲咁熱嘅天氣下，冇理由唔加$3轉凍飲架！去冰室食飯，凍檸茶真係唔可以缺少，要健康嘅，走甜就可以啦！隔多陣，海鮮煲同白飯都一齊上枱啦！雜菜煲材料非常豐富，份量一啲都唔小。而且亦都非常符合商品說明條例，叫得做什菜煲，蔬菜嘅款式果然夠多！除咗西蘭花之外，仲有菜心、椰菜等！海鮮亦都有好多唔同種類，例如青口、帶子、斑馬、魷魚⋯整個海鮮雜菜煲味道鮮甜，食完之後一啲口渴嘅感覺都冇！海鮮亦都冇雪藏味，肉質結實，味道鮮甜。再加多個白飯，就唔怕唔夠飽啦！簡簡單單又一餐！滿足。