一期一會· 尋味 (Closed)

Throwback 一下去年幫襯嘅觀塘一期一會 • 尋味，因為店名實在太配合今日嘅心情。說了再見，是否真的可再見？

呢間店以外賣為主，第一次幫襯，想揀和風醬油牛肉定食，問店員佢哋用咩牛？哥哥二話不說，走入廚房拮咗嚿出嚟畀我試，我覺得牛味夠濃，即刻扑鎚。

定食嘅飯好多，上面鋪咗飯素，有誠意；牛肉頭先試過，牛味幾濃；醬汁入面有洋蔥，甜甜哋，除咗醬油味之外，仲有濃濃嘅酒香，同牛肉味幾夾，好食。味噌湯雖然係沖包，但質素比想像中高，唔錯。

意猶未盡，食埋甜品，叫咗件朱古力辣椒蛋糕，呢個真係有驚喜：朱古力味濃而不甜，上面鋪咗辣椒細絲，令蛋糕嘅味道更 subtle 更有趣。