好食，同埋一定要叫增量版
如果唔係有啲唔夠喉，同埋因為好食，所以想食多啲哈哈
佢唔係每一次都有同樣嘅部位供應，啲牛好快就賣晒
其實佢Menu其他嘢望落都好吸引
之後有次中午想叫外賣，就叫咗個沖繩豬肉塔可飯，嗰個我覺得就不過不失，但真係好辣，辣到流眼水。雖然依間嘢好多味都係靠個醬扶持，但呢個飯都真係太多醬，令到件事有啲太濕。
今日終於試埋餐牌剩低嘅另一個菜，就係牛油咖喱雞，當初都有少少擔心佢會唔會仲辣過個沖繩塔可飯，因為上次嗰個真係辣過火屎。但點知勁好食！ ！ ！
佢個味道我唔識形容，但唔係普通咖喱咁，淨係食到重口味嘅感覺，佢係有少少溫和嘅咖喱味。同埋唔只得雞，啲薯仔紅蘿蔔之類嘅配菜都煮到好入味，好淋好好食！甚至有一刻覺得佢係比牛丼耽誤嘅咖哩雞飯店！！！！唯一我要挑剔嘅地方就係食到三份二嘅時候有啲太Heavy，咁咪唞吓食吓囉，我覺得又唔係好大影響，都幾啱做Desk lunch嘅，可以慢慢食，不過記得之後要飲咖啡，如果唔係會好眼瞓
如果要我排成間餐廳嘅菜嘅排名嘅話，我估如果你係一個喜愛健康嘅人士，一定係牛第一名，第二就係咖喱雞，但如果你係味覺行先嘅話，第一就係咖喱雞，第二先係牛！
覺得佢哋而家個生意模式唔錯，牛嗰度可以引到好多人流，支持住佢哋生意，咁你食唔到牛，都可以去食吓咖喱雞，一樣好好食，如果兩樣都食唔到你先去食嗰個沖繩塔可飯，當去試晒成個menu 咁啦
