馬師傅菜館 (Closed)

乾炒牛河牛肉嘅份量都幾多，大概有八塊至十塊左右，肉質好冧，唔會太乾柴，而且味道唔會太鹹太淡恰到好處。河粉炒得都幾好，唔會黐埋一舊，乾炒牛河最好嘅地方就係唔會太多油，而芽菜煮得啱啱好唔會太熟令到口感食落去清爽啲。蝦餃燒賣嘅水準都幾好，真材實料，可以見到有大大隻鮮蝦蝦肉，而且佢兩粒為一籠，所以兩個人嚟飲茶都可以嗌多幾款嘢食。另外仲嗌左一碟排骨同埋咖喱魷魚，排骨一半肥一半瘦，食落多汁，而且味道比較淡，唔會好濃，適合依家注重健康嘅都市人。咖喱魷魚嘅咖喱汁都唔錯，整體不過不失。舖頭最重要係人情味，呢間主打做街坊生意嘅酒樓，待應都同街坊感情好好，有講有笑，所以對客人有賓至如歸嘅感覺，值得一贊。