新川美食 (Closed)

食過新川好多次，亦都推薦左無數朋友去食。呢間舖絕對係我食過既紅磡舖頭最好食既一間。每次去親都係叫七號豬頸肉，其實好想試下佢既其他野食，但每次都捨棄唔到七號豬頸肉因為實在太好食。豬頸肉比得幾多，配幼既薯粉，再加埋獨有既撈醬汁同其他花生肉碎等配料完全係完美配搭。佢有四個辣既程度可以揀，如果想要少少辣香口d既可以揀中小辣，夠膽d食辣既可以食中辣，而大辣我就暫時未挑戰到住，如果真係好好好食得辣既可以挑戰下，如果太辣可以叫枝凍豆漿都只係六蚊左右。碗薯粉唯一要挑剔既位就係幼薯粉有時比較難咬斷，要一邊食一邊講野都有d挑戰。呢間鋪唔算大，所以如果撞正lunch時間可能要係出面等一段時間，不過佢上菜速度都好快，而且大家都食完就走，所以都唔會話要等超級耐。呢間鋪既分量亦都相當大碗，以呢個價錢黎講真係好抵食，仲要好好食，所以絕對推薦大家黎紅磡要試下！