金田家 (Closed)

金田家食嘅係九州拉麵，分店開完一間又一間，近期仲進駐紅磡。紅磡分店店舖唔大，座位都算舒適。星期日嘅下午六點，經已坐無虛席，不過等左一陣已經有位。同朋友各自都被柚子辛口拉麵所吸引，亦分別加左一隻溏心蛋。柚子辛口拉麵($98)，先試一下湯底，有啖啖嘅柚子香味，辣度適中，帶出湯底嘅鮮味。大大片嘅豚肉，切得幼薄，沾上濃郁湯頭，更覺美味。生洋蔥粒亦都為整碗拉麵加分，口感十足，亦非常香口。對我黎講，溏心蛋先係拉麵嘅靈魂。金田家嘅溏心蛋($14)，實在十分出色。蛋白部分已經十分入味，半流心嘅蛋黃，浸一浸入湯底，入口香滑美味。兩個人仲叫左一碟大將餃子($30)作分享。煎餃子非常惹味，肉嫩多汁，都算唔錯。