泰絕

Open Now

Now Closed

今日喺尖東行街，發現呢度有好多餐廳，喺門口睇完餐牌，就被其中一間食泰國菜嘅餐廳吸引住，於是就入去食晚餐。招牌菜泰式船河有三個口味：「泰斗招牌牛船河」、「招牌豬肉河」同埋「招牌牛腩河」，我哋兩個人，為咗試晒三個口味，所以我哋叫咗三碗泰式船河。食物嚟到先發現，原來細細碗，一個女士應該啱啱好，男士就應該要食兩碗。除咗船河，當然仲要叫一啲小食，我哋揀咗「牛奶烤豬肉串燒」，豚肉非常香滑，內裏仲保持肉汁，好鮮嫩。「啖啖蟹肉奄列」係一味蟹肉炒蛋，炒蛋非常香滑，味道清清地，充滿蟹肉嘅鮮味。「泰式馬拉盞炒椰菜苗」係重口味嘅推介，馬拉盞帶少少辣，好香口。食完濃味嘅嘢，可以食返個甜品滋潤一下，我哋叫咗一份「椰汁西米糕」，濃郁嘅椰汁味，甜甜地，非常推介。仲有解渴嘅飲品「泰式奶茶沙冰」，奶茶味好濃郁。「蜜糖青檸水」充滿檸檬嘅鮮味。