逸之燒 (Closed)

今晚又過嚟元朗覓食，target想食日本料理。經過見到呢間見門口幾靚，掀過個menu 都非常多選擇，就扑搥食呢間。餐廳坐位唔算多，好在咁啱有張二人枱，建議大家黎之前book定枱。由於散叫選擇實在太多，我哋決定叫二人餐！二人餐十分之豐富，由前菜到甜品全無欺場，最終滿足爆胃離開～首先係胡麻冷豆腐，豆腐香滑，凍食非常開胃跟住嚟嘅係刺身，點菜嘅時候冇特別問有d 咩。黎到超驚喜！係七款非常新鮮嘅刺身，件件厚切又鮮甜，最特別係有鮑魚喺裏面！再嚟就係好幾款日式小食：分別有好有大阪燒感覺嘅薄餅煎到脆卜卜又香口嘅明太子釀雞翼惹味芝士炸蝦反卷滿滯嘅芝士汁燒帶子食到呢度其實已經飽咗七成，但好戲在後頭！嚟緊就係我最愛嘅燒蟹膏，仲要係炭火燒嘅松葉蟹膏。一羹一羹香濃蟹膏加埋蟹肉就咁擺入口，好滿足！食完濃味蟹膏，就食返冷稻庭烏冬清清個口～烏冬好彈牙爽口！餐廳仲好特別咁加左隻鵪鶉蛋，加唔加就悉隨尊便！總之又好睇又好食，正～尾段再有清酒煮蜆同埋和牛紙火鍋。店員話和牛可以當刺身食，但係恕我唔係生牛肉嘅fan,店員都明白唔係個個接受到，溫馨提示如果煮就輕輕拖一拖就可以了。真的，餐廳用嘅靚牛肉那怕只係清湯，拖一拖就已經好好味