Fortune Young (Closed)

去烏溪沙營會，中間有時間出去食個快lunch，一出天橋就見到呢間，又唔駛等位，所以同2個同事去試試。

店面幾闊落、幾新淨，裝修以藍色同木色為主，幾舒服。店員都好熱情咁招呼我地，語氣好友善，入到去感覺已經幾好。

因為食lunch時間唔多，所以係set lunch menu中快快手咁揀左三個餐，一齊share黎食。menu中大大隻字寫住「鮮材實料 無味料」，就想睇下D食物係咪真係佢寫得咁正。

2

一黎上左一人一盅湯。每個人個盅湯都有幾件烏雞，好似真係幾正咁。飲落，好夠味，好甜，又有少少甘甘地。平日唔太鐘意飲湯既我都飲晒，係幾正！

好足料  好甘甜  正！

點心有柚子蝦餃，蝦肉大大隻，爽口彈牙，仲有D柚子蓉，感覺幾清新。叉燒小豬嘜，可愛既叉燒包，D肉唔太肥，個味又唔會太甜，幾好！

賣相精緻  味道清新

咕嚕豚肉，外面炸到好鬆脆，裏面又鬆軟，酸酸甜甜，又唔會有陣好強烈既醋味，nice!

外脆內軟

黑椒花生芽雞柳，豆芽食得多，花生芽真係第一次食。花生芽比豆芽粗，所以更加有口感，同埋多汁，唔錯唔錯。

黑椒花生芽炒雞柳

瑤柱瓜粒肉碎泡飯，好清甜好消暑。

消暑佳品

最後要趕住走，所以冇時間試埋個甜品。成餐飯都好滿意，下次要再黎試埋個甜品先