今個母親節， 我帶咗阿媽去「盈福小館」食晚飯，因為貪佢嘅菜色夠特別， 平時自己好難煮到。
坐低之後， 叫返個頭盆小食。
《鮮 ．嫩 ・爽 $138》， 冰鎮鮑魚仔，「鮮」味十足， 鮮甜可口。
水晶餚肉， 晶凝通透，肉色紅潤， 十分嫩「嫩」滑。
涼拌海蜇甘筍絲就「爽」口彈牙， 好好味！
我次次都想食八寶鴨，但又怕二口子食唔晒， 今日見到廚師巧妙地將八寶鴨變成《松露醬菌香八寶鴿 $168》，咁就太好了，真係又神奇又美味！
我自己好喜歡用松露做食材， 因為被佢嘅香味深深吸引住， 而乳鴿非常嫩滑， 仲要係無骨， 啖啖肉， 真爽！
一切開， 香味四散， 不但有香噴噴嘅松露味， 而且仲有其他濃郁嘅菇味！
八寶鴿係一味心機菜， 釀咗好多種餡料，有蓮子、百合、紅棗同什菌等等。 材料十足， 真係值得一試。
我好鍾意呢個《杏汁花膠燉豬肺 $68位 /$288》， 因為平時自己好少煮，製作需時又繁複。
飲落好滋潤， 潤肺養顏， 女仕恩物， 仲加入花膠， 令口感更佳， 花膠吸收晒湯底嘅精華，真係令我回味無窮。
上枱靚靚嘅《壇子剁椒魚 $128》， 十分惹味， 有香濃嘅剁掓香味， 味道偏辣， 但魚肉非常鮮甜嫩滑，加埋多種香料同剁椒， 真係又「香」又「鮮」又「辣」！
《沙溪扣肉 $98》用來拌飯食就一絕， 扣肉好好味，肥而不腻，入口融化， 梅菜咸中帶甜， 十分惹味！
最後食番個《椰汁燕窩 $68》就更加完美啦！一上枱時已經椰香撲鼻， 味道香滑亦唔太甜。 椰汁燕窩又養顏又好味， 正！
