老闆娘雲南米線

米線控朝聖，傳說中被米線耽誤嘅炸物店😂。搵咗一輪先搵到，位置幾隱蔽，我係平日下午五點開門嗰陣就到，未夠半個鐘舖頭已經坐滿，人氣真係唔講得笑。環境比想像中企理，冷氣夠，坐位唔算多但唔迫。

叫咗蒙古湯大辣底米線，餸就揀咗雜菌腐皮卷同醬汁豬軟骨。炸腐皮卷睇落好多油，但神奇嘅係食落一啲都唔膩，外脆內香，層次感足，口感相當討好。豬軟骨唔係佢哋出名嘅餸，但都好出色，夠腍又入味，食落有驚喜。

蒙古湯底風味獨特，有孜然嘅香味，湯底自帶肉碎同香蔥。因為湯底好濃郁同香辣，以為食完會好口渴，但結果竟然一啲都冇，呢樣好加分。

總括嚟講，味道係滿足到期待值，如果唔需要排隊，一定會再食，但要排太耐嘅就未必會。