HIKARI

餐廳以簡約為主，裝修好有心思，畀人有放鬆嘅感覺。餐廳有兩層，樓底非常高，視覺上增添咗餐廳嘅空間感。沿著樓梯行上去有個小閣樓，配搭日系傢俬，文青氣息味濃，餐枱、座椅及擺設都好有Style，坐得舒服。餐廳有小食、沙律、意粉、意大利飯、甜品同特色飲品提供畀客人選擇，而我今次就揀咗一款小食、一個意粉同一杯飲品。一口牛牛柳粒煮到六至七成熟，用刀切開，睇到內裡肉質紅嫰。香脆嘅蒜片同牛柳粒估唔到係非常之搭配，牛柳粒入口嫩滑加上蒜味香濃，越食越滋味。香煎野生比目魚蝴蝶粉整道菜嘅presentation好靚，比目魚煎得非常香口，魚肉食落好香滑，配上海鮮忌廉汁同伴碟蔬菜，呢碟蝴蝶意粉可以話係色香味俱全。黑芝麻鮮奶拉花技術實在有驚喜。一飲落口，香濃嘅黑芝麻味出哂嚟，味道唔錯。