Four X Four (Moved)

大圍顯徑一帶食肆都係以茶餐廳為主，因為夠 Local， 實有人幫襯 。所以作為顯徑人，都好渴望一落樓下，就可以飲到意式咖啡，上天應該係聽到顯徑人嘅禱告，開咗間叫「Four x four」嘅咖啡店。

而 Four x four 嘅前身就係一間唔起眼嘅「龍豬冰室」，係唔起眼嘅地方開咖啡店，反而會令人期待、去嘗試。

今次係第三次光顧。記得店家剛開店時，下午茶時段（3：00pm後）只賣All day breakfast 同多士等小食，對於鍾意食brunch嘅我嚟講， 略嫌唔夠喉。

估唔到，店家會定期轉menu，而且加入咗d較飽肚嘅食物，包括「醬油忌廉西班牙豬肉扁意粉」同「自家製羅勒醬煙肉扁意粉」。

食過All day breakfast 同焗多士等食品，味道正常，因為烹調簡單，唔會太差。反而最大驚喜係「醬油忌廉西班牙豬肉扁意粉」同「自家製羅勒醬煙肉扁意粉」。「醬油忌廉西班牙豬肉扁意粉」 蒜片炒得夠香 ，食得出應該係用鮮忌廉汁嚟炒，好好味；而「自家製羅勒醬煙肉扁意粉」嘅羅勒醬入口清新，配埋d芝士粉/ 焗麵包糠碎，好快可以KO一碟，唯一美中不足係有少少鹹 。

至於義式咖啡方面，咖啡溫度、 拉花嘅賣相、咖啡飲落嘅口感， 三方面都平衡得幾好，在地方小店而言，已經好高質。