赤

夏日將至，今日決定食啲清淡啲嘅。但係去到銅鑼灣 百德新街呢啲美食天堂，點可以待薄自己？行過街口見到呢間係轉角位嘅日本居酒屋。簡潔嘅裝修，街角兩邊大窗，對住油站個位，心諗坐喺裏面望住個街景，慢慢食過魚生飯都應該幾chill。


秉承日本簡約實用嘅裝修，雖然鋪面唔係好大，但係啲位就坐得好舒服。


Set Lunch 嘅選擇好闊，由簡單嘅 滑蛋豬扒飯，到 馬糞海膽丼 有成16款。


呢度嘅前菜係無限添加嘅 椰菜絲沙律，一定要睇嘅係佢哋嘅芝麻沙律醬，好啱我口味。我添咗3次。


友人 叫咗 馬糞海膽吞拿魚蓉丼。甘香嘅海膽好新鮮。吞拿魚嘅肉打得晶瑩飽滿。睇佢食得好滋味。


我就叫咗個三色刺身丼，吞拿、油甘、3文 正常新鮮。


佢哋嘅茶碗蒸蛋都做得好出色。


其實呢啲lunch 無論係材料服務都好簡單，唔會做到飛上天咁。新鮮嘅食材、安心嘅材料來源、乾淨企理嘅地方、寧靜嘅環境、只有用唔用細語嘅食客，當然唔少得四平百穩嘅枱凳。就係咁樣，滿足嘅午餐。