夏日炎炎實在令人提唔起勁煮飯，同先生行完魚街索性買埋外賣返去做晚餐。
餐廳食物選擇多，而且價錢抵食，門口有大大個餐牌，方便食客叫外賣。
豬頸肉一客三至四件，香口彈牙而且唔油膩，味道亦唔錯。
先生每次必食嘅極品牛三寶，湯底香濃而且配料豐富，有生牛肉、牛𦟌同牛丸，最欣賞佢嘅牛𦟌，唔會太過軟爛。
天氣實在太熱所以我今次叫咗香茅豬扒撈檬，豬扒唔算厚但香茅味好濃，配搭酸甜爽口嘅撈檬解暑一流。
粉麵加十蚊就有特飲，味道方面中規中矩，椰汁味道稍淡，但勝在甜度適中，清新解渴。
呢間越式餐廳我哋已經幫襯過好多次，貪佢好味又抵食，仲可以平價追加小食同特飲，而且叫外賣起菜亦好快，係我哋嘅外賣首選！
