廣發餐廳 (Closed)

難得同風蛇同一日放假，拍拖去下旺角行下魚街睇下小動物放鬆一下。後生仔女去旺角行街拍拖係日常，要試特色餐廳，可以話一早試過曬...不如簡簡單單，求其搵間茶記食返個tea 醫下肚就算啦！今次既廣發餐廳就係風蛇話有日做野時同同事試過，覺得份量十足，味道又唔錯。一入到餐廳，冇曬卡位，等左唔夠2分鐘，有客人離座，樓面姐姐就即時衝過去執枱，仲笑笑口好殷勤咁叫我地埋去坐。放低2杯水同menu ，佢就行開左俾時間我地諗下食乜。風蛇叫左個豬扒包配薯皇，跟杯凍啡（$39），我就叫左個豬扒炒公仔麵都係跟杯凍啡（$45）。一上枱，「都ok大份啊！」，味道都不過不失，豬扒應該冇落好多鬆肉粉，唔係淋滋滋，但都唔係死實實。食完啲豬扒同麵，發現原來半碟都係配菜（利申：已經食左唔少配菜），感覺好似硬湊到咁上下大碟咁個面既份量食完覺得少過一包咁...風蛇既薯皇炸得香脆，剛剛好... 豬扒包叫左少汁，配搭又係啱啱好係旺角區，依個價位既下午茶算係差唔多...抵食指數： 3.5 / 5好味指數： 3.5 / 5服務態度： 4 / 5