No. 5 Lounge (Closed)

原來鴻圖中心地下變左做食堂，一入去真係好有驚喜，有好多新既店鋪，真係搵食既好地方！下午時間人流好多，不過入邊位置算多，搵位都無太大難度。今日唔係太肚餓，想飲杯好野，所以揀左呢間No.5 Lounge. 見佢飲品選擇都多，主打應該係咖啡，另外仲有鮮打果汁沙冰咁，都好吸引。luncu set有個意式饀餅配可樂，加錢就可以轉唔同既野飲，三四十蚊都唔貴。今日唔係太熱唔想飲凍野，所以我加錢叫左杯枺茶Latte, 連埋包要$60, 價錢唔係特別平。意式饀餅方面好多味道都賣曬，最後叫左個芝士火腿。坐底等左陣，先上意式饀餅。賣相好好呀！包包有烘熱左，脆脆地，包本身有提子，甜甜地，配埋芝士生菜火腿，估唔到咁好食！芝士好香，火腿都唔太咸，夾埋一齊真係好正！配得好好！食完野杯枺茶Latte已經在枱上，拉左個大心心，令人心情愉快～杯枺茶Latte唔太甜，枺茶味夠香，滑，令人好滿意！食完飲完見人流少了，行過去同店主吹兩句，因為我見到佢個鋪有好多酒呀！唔通晚上會變身？咁店主話原來未請到人，晚上係預左有酒賣的！正喎！觀塘都無咩地方可以happy hour，家下有個好地方了，期待遲D放工嚟飲返杯！👍👍👍