傅師傅甜品小食

Open Now

Now Closed

同教會o既朋友黎食個快飯，見佢有個鯊魚骨湯底o既拉麵套餐，連是日糖水都只係20元，就即管試下。叫左個釀雞中翼拉麵，要左鯊魚骨湯底﹝重有加辣同咖哩兩個選擇﹞，糖水就要左綠豆沙。個拉麵好似幼上海麵，質地麻麻，但又未到難食；雞中翼中間釀o既係綠色蔬菜茸，都幾特別，由於係番炸兼浸左湯，味道略打折扣，但算係唔錯的。綠豆沙黎到，原以為冇特別聲明就即係要熱o既，原來未必，今次係凍o既─朋友話一定要講明要凍定熱，否則唔知佢俾咩你架！講番個綠豆沙，雖然唔係好起沙，但好香臭草味，亦食倒絲絲海帶都唔錯，如果係熱o既應該更好。朋友叫o既腐竹糖水就仍見片片腐竹，似乎麻麻地。不過20大元食到飽一飽，重想點？由於主廚係做開酒店，我估佢D西式甜品會好味些。朋友話佢o既焗蛋白布甸幾好喎，下次有機會都會一試。