其實身為荃灣友之前已經食過好多次，早前入院又剛好與金坊嘅開山泰籍女大廚住同一間房，大廚嘅友善同見到佢兩位年青老闆當佢家人一般嘅尊重同關心，出錢出力，令我對金坊大大加分。
芝心蝦丸，雖然個價錢$88可以點到碟咖喱，但仍然係我每次必點之選。有次去路德圍唔想等試咗另一間泰菜但無呢味餸，朋友仔極度失望。我要求原粒上，想要爆醬效果，但最後都係開咗邊，可能驚啲食客辣親嘴。蝦膠彈牙，外層一層薄薄脆皮，大量芝士。今次啲芝士凍咗少少，而且上菜次序好隨意，今次係上哂所有主菜主食先上。建議唔洗點雞醬，會搶咗啲芝士味。
柚子沙律，好幾辣，記得以前係無咁辣。大量脆花生同蝦米，啖啖咸香。柚子嘅甜中和咗少少辣味。
燒大鱔，金坊燒物一向出名，路德圍店仲有個大燒烤爐喺店門，即叫即燒。連著魚皮嘅大鱔好新鮮好肥美油潤，肉質爽口彈牙。
咖喱扇貝，係加咗蛋嘅泰式咖喱，唔辣，好香濃。扇貝殼似裝飾多啲，因為全部扇貝肉都離哂殼。有六粒扇貝肉，size都大，連群邊，不過似急凍貨，無咩味。
大蝦炒金邊粉，份量好大，啲蝦的確幾大隻，有大量蔥段芽菜蛋絲同豆卜，調味一流又唔油，熱辣辣上枱，好好味，但凍咗啲豆卜有少少唔新鮮嘅味道，所以一定要趁熱食。
1
海南雞飯好抵食，$51，好似啲男人燒味飯咁大碟油飯，飯中間有幾粒少少乾水，但自己偏好粒粒分明乾身嘅飯，而且油飯調味適宜，主食飽肚之選。
海南雞飯送嗰個冬瓜湯仲送多隻雞腳。
樓面人太少，令服務未盡完美。
我哋係唸住用咗張月尾到期嘅優惠劵芒果糯米飯優惠券先尊登幫襯，我哋落單時出示就叫我哋食完正餐埋單時先用。到埋單又話今日好多客唔用得，一時又話無哂(雖然我唔係好信)，叫我哋袋好張劵下次先用，之後仲賴神秘細細話送多啲原本枱枱都送嘅大菜榚俾我哋，但我話我唔鍾意食，唔使。
落樓後，家父仍對接待姐姐念念有詞咁話等返好耐，姐姐後來主動俾咗張9折卡我哋，最終算有少少收穫啦。免加一，食物樣樣都有一定水準，所以仲會繼續支持，不過會選擇閒日。
