朝早10點去到, 見一路未開門, 等到15分都未開就走人, 但行來行去都唔知食乜, 結果10半打去問, 佢話啱啱開門, 咁就行返過去食啦。
入到去, 其實都未預備好晒, 有2個STAFF, 但未得閒接待客人, 我第一次去, 唔知係點餐先定坐定先, 企咗2-3分鐘都無人接待。
到 staff 處理咗手頭上既野, 幫我地落order時, 我都未見到有出名既自家制新鮮面包, 有d失望......
再等多幾分鐘, 就見自家制面包被放上display 櫃入面了。原來送新鮮面包來的店員還未有時間放入櫃賣。
今日有3款麵包, 有紫薯麻糬麵包, 芋蓉麻糬麵包 同 另一款唔記得咗咩名, 我就叫咗個芋蓉麻糬麵包 + 一杯 latte ($75)。
長長既麵包, 望落唔多好味, 白雪雪咁, 送上枱既時候係室溫既, 質地係軟軟既。
麵包一比完錢坐低就送上枱了, 我一邊食, 一邊打機, 已經食得好慢好慢, 每一啖都用刀叉切, 都仲未見到杯 latte, 由我order完杯latte都上枱等咗25分鐘
, 自問我都做過coffee shop, 間餐廳其實都係講緊得5個客, 我杯又唔係hand drop coffee, 都唔明點解等一杯咖啡要等25分鐘! 等到杯latte, 我個包得返4分1。
講返D 味道, 麵包係軟軟室溫既, 正如我所想, 麵包應該要微溫先好食, 所以我當然覺得呢個包既味道一般, 但入面既餡料係好足既, 由頭到尾都有芋蓉同麻糬, 芋蓉少少甜, 我覺得適中 (對於重口味既人, 應該係叫無味)。麻糬就口感軟滑, 煙煙韌韌, 少少甜, 係ok既!
杯latte既coffee都好濃, 牛奶都夠滑, 又有少少latte art, 但可能等得太耐, 唔覺得值25分鐘等一杯味道正常既咖啡!
總結來說, 野食無覺得特別好味, 咖啡正常, 未必會再黎。
