力奇四季火鍋 (Closed)

星期六晚同兩個朋友去力奇食火煱，點知食到一肚氣，我諗下次都未必會再黎。8點幾黎到，出面都有成廿人等緊位，原本想話改去九龍城既方榮記食，朋友話邊度都要等，不如係度食算啦。等左半個鐘條龍愈來愈長，但係一張枱都無，過左一陣，有個阿姐出左黎再問我地幾多位，之後就鬼鬼祟祟咁入番間舖度，全程都無叫過冧把。又過左１５分鍾，見到Ｄ等緊位既人突然間消失晒，原來Ｄ人已經有位，就連遲黎既熟客都有。同阿姐發完老脾，即刻有枱俾我地。坐低左十分鐘，先有人肯執枱，再搵人落埋單，到野食黎，成30分鐘。點知剩係得碟公仔麵黎左，我地３個人因為太肚餓既關係，好快食左個麵。然後再等成15分鐘，其他食物先開始黎。我地叫左個沙爹湯底，同埋：雪花肥牛、羊肉、雙滑、魚餃。沙爹湯超甜，濃就真係勁濃，不過完全掩蓋食物味道，食左一陣就覺得好滯，下次寧願去方榮記好過，講service又好過佢，食物又好食Ｄ。