壹火鍋

Open Now

Now Closed

第一次食呢間火鍋店，位處於人來人往既兆萬中心。我地7點半到入座，可能係平日，所以仲未滿座。一坐底，伙計就即刻同我地介紹佢地既推介湯底──海鮮窩，見佢講到咁吸引，就緊係試下啦，仲同我地講埋拎野飲同醬料既地方。我地仲加左錢食埋刺身，鮑魚片同鮮蝦都幾鮮甜，三文魚肉質鮮嫩，一開始以為火鍋店的刺身品質唔會太高，無抱太大期望，但食左後感覺水準唔錯，都幾新鮮，物有所值。好快，個海鮮窩就黎左，一睇，嚇親，勁多料，未叫其他火鍋配料已經好多野食，如果份量少D就好，因為仲叫左其他配料，太多會試唔到太多款。試左都幾多款配料，其中肥牛肉色澤鮮紅，脂肪比例恰當，幾岩女士，但稍嫌肉味不夠濃，會比湯底味道蓋過，同埋雪藏耐左，唔係太新鮮。最後食埋甜品！係雀巢雪糕。細細杯岩岩好不得不提，呢間餐廳既侍應服務好好, 好主動幫我地加湯, 提醒我地拎醬料既地方, 都會主動收拾碗碟。總括黎講，呢個價錢算係唔錯，都推介比大家。