泰亭 (Closed)

放工後同朋友食飯，佢提議呢間餐廳。無問題吖，還掂我都未試過。七點前入座嘅好處係可以自己揀坐邊張枱，我同朋友就坐咗最入面嘅半卡座，貪佢夠靜可以食住傾(傾住食？)菜牌價錢唔太貴，都係六七十蚊起。朋友食過話份量係細少少，所以我哋兩位女士連甜品都叫咗五樣。泰式金柚沙律 - 金柚肉多又甜，係令人食到好開胃嘅前菜。炭燒豬頸肉 - 豬頸肉好冧，配埋個酸酸哋嘅醬無咁肥膩，食多幾舊都得，只不過唔似係炭燒啫。蒜蓉炒椰菜苗 - 正正常常一碟菜，不過就唔多似苗。味道對我嚟講有啲重，蒜同鹽都略多。炸蝦餅 - 好有蝦味，又夠彈牙，好好味。炸到外皮有啲脆，上枱時係熱到食唔倒嘅，要攤一陣先可以入口。芒果糯米飯 - 好多芒果，暖暖哋嘅糯米飯夠軟熟。唯獨係我覺得椰醬好似稀咗少少。第一次食，樣樣都好味，下次嚟可以再試其他食物。