到我哋人齊入去坐低之前，果煲粥底已經為我哋準備好滾緊，然後10分鐘之內已經將個餐嘅全部配料放上枱。店員見我哋第一次嚟，仲教我哋應該食邊樣先，唔同種類嘅海鮮大概淥幾耐。
第一味食嘅呢就係鮮鮑魚，鮑魚新鮮，表面有光澤，肉質爽口，但本身味道唔算話係好突出，可能我自己本身麻麻地鍾意食呢樣嘢。
生蠔我的至愛
，新鮮肥美大隻，淥完之後都無話縮好多水，蠔嘅味道唔算係好濃，不過淥蠔果陣記得要睇實時間，千祈唔好淥太耐，唔係肉質就會變老變硬。
啲蜆本身唔算話好大隻，但就隻只嘅size都差吾多，無話有啲特別細隻。倒晒落去之後你會見到佢哋一隻隻咁開口。蜆肉乾淨無沙，每一隻都開口，肉質清甜
。
呢度嘅生蝦到上枱果陣都真係仲係生嘅，見到佢哋仲識郁。蝦肉晶瑩通透，非常新鮮。咬落去爽脆多汁，鮮味至極，正
自己本身比較少食蟹，嫌麻煩食。花蟹就更加少食，嫌佢無咩肉食。同蝦一樣，隻蟹非常新鮮，上枱果陣仲識得郁。花蟹剪開咗一半，每人有半隻。出奇地佢呢度嘅花蟹肉質都幾多同幾實淨，唔會好水，蟹肉就當然鮮甜啦
。
倉魚本身都好大條新線，眼睛晶瑩雪亮。魚半身油脂豐富，食落口非常甘香
鯪魚肉鮮味有口感，魚肉嘅比例多，唔似得好似街市果啲放咗好多粉落去，食落去好似舊膠咁。
雖然係海鮮火鍋，但打邊爐又點少得肥牛呢？牛肉色鮮，脂肪分佈均勻。食落去嫩滑，好香肉味，火鍋必備
魚丸雪白爽口，但就唔係好彈牙，味道比較傳統，唔多化學調味，食起嚟有小小魚腥味。怕腥嘅朋友建議大家食果陣加幾粒蔥花去平衡返。
黑椒牛丸同一般街市貨色好唔同，呢隻牛丸用嘅係原粒黑椒，同磨碎咗嘅黑椒相比，原粒黑椒個辣味無咁突出，返而更加散發出黑椒本身嘅香味，更加有層次，夾埋響牛丸裡面，就好似薰香咗成粒肉咁，好正，要去細味品嚐
超甜粟米，攞嚟送粥一流
呢個粥我諗係每個人打邊爐果陣嘅夢想，論湯底嘅味道，試問世間上有啲咩及得上打完邊爐嘅湯底。佢集合晒各樣配料，餸菜嘅精華於一身，好多人到差唔多打完邊爐果陣就會話：『嘩，如果可以攞呢個湯底嚟煲粥就正！』 響呢度可以讓你嘅夢想成真。當你呢餐接近尾聲，啲配料食得7788嘅時候，店員就可以同你將火鍋嘅粥底攞嚟煲粥，響放米之前店員仲好細心咁將面頭嘅泡泡同埋果層油缽走，跟住就放埋蔬菜籃裡面啲瓜去煲。
幾分鐘之後，個米糊就已經變咗粥。個粥好有膠質，好綿滑，而且吸收晒頭先海鮮，雞肉同牛肉嘅精華。加上少少蔥花，再伴上油炸鬼，真係飽到捧住個肚都要食多幾碗
響食嘅過程中，店員周不時都會走過嚟睇下我哋有啲咩需要，服務周到。有個大姐姐好得意，講嘢又好搞笑。場地方面有兩張大卡位，同三張長枱，多人的話最好訂位，座卡位會比較舒服，長枱會比較窄。每張枱上面都有部冷氣，大熱天時都唔會熱。環境都好企理，廁所仲出奇地乾淨
。
$188加一呢個價錢，食咁多款海鮮，仲要咁新鮮，真係好抵食。鍾意食粥嘅你一定唔可以錯過！
