木船 (Closed)

今日入咗大埔行吓，上網見到呢間餐廳好多人讚好食，不過服務就麻麻甚至負評，但心諗好多好食嘅餐廳員工都好有性格，照試咗先啦。食物的而且確好食，生蝦夠新鮮彈牙，生菜包味道好份量夠，特飲亦唔錯。基本上同喺九龍城食泰國菜差唔多水準，甚至比部份更加好。以我眼觀嘅服務質素係出奇地好，侍應們做嘢爽手、有效率夠團結，禮貌亦不錯。咁我就好好奇啦，最後喺埋單時忍唔住問待應妹妹。我：網上食評話你哋服務質素麻麻喎，但我睇咗成餐飯唔覺得差，仲幾好添。跟住侍應妹妹搭咗個我無諗過嘅答案。「我哋係夜班。」果然一竹篙不可打一船人，間店名仲要咁橋叫木船添🤣🤣最後臨走時我影咗兩張店內嘅相，侍應妹妹見到走來同我講係咪同佢地寫好評啊，然後微笑躹左一個30度嘅躬。因為呢個發自內心和誠意嘅躹躬，就引發了我的第一篇食評。