由於我個朋友係每個禮拜都要食一日素既
今日佢就帶左我嚟呢間素食餐廳
Dinner set見到既配搭都幾多 主菜西式中式日式都有
前菜總共有三款 都幾多
有麻醬牛蒡青瓜粉皮 柚香紅菜頭蘋果拌合桃 脆藜麥羅馬蕃茄拌芝麻醬
三款前菜都好好味 食落清新開胃
特別係個蘋果 淡淡既柚香配上甜甜地既蘋果
酸甜既平衡做得好好 即刻令到胃口大開
手卷有兩款 我自己食左香芒牛油果苜蓿芽手卷
芒果好甜 牛油果味道都濃郁
苜蓿芽食落有種脆脆地既感覺 味道清新
重點係塊紫菜真係好脆 成個手卷都好好味
餐湯有中式燉湯同埋西湯
我飲左白松露椰菜花忌廉濃湯
松露既味道好濃 而且個湯唔會太鹹
見到我朋友既燉湯都好似好足料
主菜我地叫左和風鮮蔬一品豆乳鍋 配稻庭烏冬
豆腐口感好好 唔係一咬就散果種
個鍋既重點係d鍋 味道係超級清甜
我同個friend差唔多飲曬成鍋
2
另一款主菜就叫左椰香冬陰功鮮蔬義大利飯 配吉列蒟蒻
義大利飯水準好高 飯粒真係做到有少少硬果種感覺
我地叫左辣既但其實都覺得唔太辣
冬陰功味道濃郁 酸酸地另外佢有少少蕃茄味 食到停唔到口
去到叫甜品果陣其實我地已經好飽
我地叫左椰香紫薯千層糕同埋榛子焦糖乳酪蛋糕
蛋糕質地係我好鍾意既偏硬質地 乳酪既味道係超濃郁
千層糕就好煙韌
我平時好少食素菜 但我對呢間餐廳既感覺幾好
佢既款式好多 而且大多都係一般人都會食既款式
而且食物質素都好高 又大份 食得好滋味
