深井泰皇菜 (Closed)

在深井開鋪唔單只要做遊客生意，重要做埋街坊生意先可以在這區站得住，如果平日拍烏繩，靠假日才有生意就死得。深井以燒鵝出名，來此區者很少會選其他菜式，所以我話另類菜式其實是街坊幫襯多。泰皇菜在深井區都經營了多年，仍然守得住，全因水準都過得去，價錢合理。午市一人套餐最貴都是42元，可接受。 今日是復活節最後一天假期，幫襯了泰皇菜食午餐，湯粉餐跟小食、飲品、甜品，炒飯、炒粉餐跟餐湯、小食、飲品、甜品。全份餐都很豐富，在快餐店買一個飯都要30多元，重唔包飲品。這餐點了泰式菠蘿炒飯、泰式牛腩金邊湯粉。菠蘿炒飯，菠蘿很多，味道酸甜適中，配上一些五顏六色的雜菜粒及雞肉，看上去色彩繽紛，增強了食慾。那小碗例湯有冬瓜豆腐肉碎來滾都入味，當然仍是有味精，不過不太鹹，可接受。 牛腩金邊湯粉，一端上檯便見到紅、白蘿蔔兩大件，牛腩不是港式的一大件，而是一小片，一小片，這樣好，容易食，但味道卻一般，可能食慣冬蔭巧功湯底，這次是清湯底，我覺得不夠惹味，但份量足可以飽肚。小食有炸蝦餅及魚餅，味道都不錯。食完主菜後再來份椰汁西米糕，一杯咖啡，來這裏輕輕鬆鬆食個Lunch，這個復活節最後一天的假期就過得很滿足了。