某日心血來潮想食拉麵，
發現原來自己上一碗拉麵係
舊年十二月喺大阪食嘅一蘭🍜，
於是喺app搵到呢間位於中環、
由大阪著名冠軍級拉麵大師林隆臣主理嘅拉麵店，一解我對日本嘅思念，我覺得質素不俗！
ramen cubism特級白湯 （小）$88
呢碗湯底用雞骨、雞肉、
雞腳熬製超過八個鐘而成嘅拉麵係呢度嘅招牌🐔，
一上檯我心諗吓我啱係叫細㗎咩，咁大碗嘅？！
anw膚淺嘅我對拉麵嘅評價只限於個湯同個麵，
而呢個奶白色嘅雞湯非常得我心，
雞味濃得嚟唔會好油，
拉麵我會話偏硬身，亦做到掛湯嘅效果，水準之作。
至於塊肉，我係。。。唔識評價嘅，
都幾厚幾大塊囉（廢話）。
海體醬油湯 $88
呢個湯係用九種唔同嘅醬油調製而成，
比白湯清淡，不過隨麵附送一大碟油脂極為豐富嘅厚切叉燒aka肥肉，我本身仲以為佢嚟錯咗，
入口即溶，極為邪惡！
自家製餃子 $60
皮薄陷靚，外皮香脆肉汁夠多，無得輸。
•用app book有折，當日半價，抵食！
•門口有啲隱蔽，
係日式小店嗰種簡約低調嘅風格，
所以要轉落條巷仔落樓梯，唔好miss咗呀～
