先食左芋泥鴨鬆九層塔春卷。春卷皮炸得薄脆，金黃香口，咬落去唔會太油。入面鴨鬆炒得入味唔柴，配上綿密嘅芋泥，甜鹹平衡得好正，配埋九層塔好有台灣味。仲有少少拉絲芝士，熱食時拉得耐，口感豐富但唔搶戲，整體幾好食，幾啱做開胃小食。
主食係台灣腸油渣香飯配溫泉蛋。鐵鍋上枱有火燒住個鍋幾熱辣辣，飯用豬油撈得香口但唔會太膩，油渣脆卜卜，配埋腊腸粒、酸菜、紅蔥酥，味道好夠鑊氣。溫泉蛋撥開，蛋汁流出同飯一拌，變得滑溜又creamy，暖笠笠好啱冬天食，份量都幾多，食到飽飽哋。
飲品飲咗草莓沙冰芝士奶蓋。上面芝士奶蓋打得綿密，帶少少鹹香，下面係草莓沙冰，酸甜清新，兩層口感一齊飲落去幾夾，草莓味夠真，唔太甜，飲完好解膩。
