日本野 (Closed)

今日M佬話同我去食日本野，再同我去拍吓拖，我當然話好啦，但問極佢去邊間日本野，佢都猛話未日本野囉！搞到我哋好似麥兜同麥太對話咁，原來真係有間餐廳叫日本野架！呢間位於旺角銀城廣場嘅日本野，CP值相當高，M佬真係無介紹錯。牛舌串燒兩串牛舌，都幾抵食。除咗其中一塊可能燒得耐咗，韌咗少少，其他嘅都好好味！牛舌嘅肉汁夠juicy，濃厚嘅牛香同口感一流。厚燒鰻魚玉子玉子燒嘅蛋味好香，相信係用上日本雞蛋！而香滑嘅玉子裡面仲有鰻魚，加上鰻魚汁，真係無得輸！但最驚喜係鰻魚無碎骨，食落去好軟綿。雜錦壽司拼盤拼盤有六款壽司：三文魚、油甘魚、牡丹蝦、赤貝、帆立貝、海膽。三文魚嘅油脂平均、加上柚子嘅油甘魚，更突顯油甘魚嘅濃郁、牡丹蝦大大隻，彈牙夠膠口，而蝦頭仲有好多蝦膏、食得出赤貝好新鮮，因為夠爽口、帆立貝上加上黑松露更顯得矜貴、相對海膽就中規中距啦。精選角切魚生丼成碗魚生丼上鋪滿勁多蟹子，一啖食落口真係好幸福呀，鹹鹹哋嘅蟹子加上飯，講真，連豉油都唔洗落。而角切魚生內有三文魚、八爪魚、吞拿魚同玉子等，夠晒豐富。