三喜餐飲小廚鑊氣小炒雞煲火鍋 (Closed)

好耐無食過中式小菜，喺佐敦行吓街見到到三喜，見環境都幾光鮮同舒適，家庭式經營嘅中菜應該會唔錯，一於同男友試下。 食品有好多選擇，呢度除咗有火鍋雞煲，仲有平時少食同唔常有嘅食物，我們叫咗芥末薯仔牛柳粒。先講薯仔，好有心機炸過，做到「非常外脆内軟」嘅效果。牛柳粒腍得嚟有咬口，而個汁又調較適宜，唔會太辣唔會太多，有creamy wasabi嘅感覺。而海味小炒王炒得非常有鑊氣，香噴噴，材料都有好多，九菜花夠爽口，再配蝦干、土魷、腰果等，送飯一流！而葱油雞非常好食份量足，雞肉嫩滑，最緊要係葱蒜夠多，食葱油雞葱先係靈魂所在！反斗雞翼球真係唔係度度有得食，好考功夫，拆完骨仲要翻返出嚟變小雞脾，賣相特別。我諗好多小菜館未必會咁做，而我都係第一次食，炸都脆卜卜，唔會太乾，因為佢有黑椒汁，汁杰少少會再好啲，不過而家食落好惹味，配酒一流!!!!黄金蝦球係推介之選，佢有别於平時食嘅黄金蝦，平時食多數都係蝦殻先有黃金（咸蛋黃），而呢度用嘅係淨蝦肉，每粒蝦肉都沾滿咸蛋和牛油嘅香味，但又唔會太咸，味道啱啱好，而且外層非常脆口，食落去好咸香，真係忍唔住一粒接一粒，減肥都係聽日先算！