八方小籠包 (Closed)

近排煲中藥調理一吓身體，知道只會煲一段短時間，所以上 Carousell 打算買個二手電子中藥煲算數，今日就約咗個賣家係北帝街交收，咁咪順道同女友小熊去果頭食晚飯開餐.北帝街同譚公道哩頭滿佈餐廳食巿，總有一間啱心水，而且成日變，久不久就有餐廳結業又轉營.今次經過見到哩間八方小籠包，印象中係新開張，於是推門入內幫襯.土瓜灣哩區完全無一間質數高服務好嘅上海菜餐廳，有果D一係質數低，一係服務超超超差劣! 希望哩間八方有驚喜啦!餐廳環境光猛乾淨闊落，印象分滿分先啦!係門口已經被一張蟹粉小籠包招紙吸引，當然要點一籠啦! 雖然食緊中藥唔可以食蟹，不過今年大閘蟹當做已經慘慘豬忍住唔食好鬼可惜，食一個半個啫! 忍唔到口囉!上海嘅蔥油餅係必點，小熊點咗個酸辣湯我點咗蟹粉碗仔翅，最後係點蔥爆牛肉.蔥爆牛肉肉嫩Juicy, 香蔥夠爽脆，只係牛肉味道重咗少少.蔥油餅外形同平時食開嘅完全唔同，外形一圈圈夠特色而且多一份外層酥脆口感，蔥份量足夠，但蔥油嘅油香味比平時嘅蔥油大餅少.酸辣湯酸同辣味各佔一半，無話偏重一方，辣度輕微而配料足，一早知道有蔥花的話我會要求多蔥!蟹粉小籠包蟹黃味十足，皮薄料足味道有少少偏甜.