同bf兩個人叫左一個"蝦醬海鮮炒飯", 一個"干炒牛河", 一個"砵酒煙鴨胸"....之後坐嚮度等食睇電視。點知無情情有個侍應走來呆住咁問我..."小姐你係咪叫左一個'砵酒煙鴨胸' 走鴨胸? "我地當堂呆左一呆~~然後拎左個餐牌出0黎指住俾佢睇..."係 '砵酒煙鴨胸',唔係'走''鴨胸! 唔要鴨胸咁可以食咩0野呢?" 之後都唔知佢明定唔明就行開左.....
以為事件完結左, 算數啦啦! 唔想勞嘈! 但當"畢畢"下"蝦醬海鮮炒飯"之際, 又有另外一個黑色衫既侍應問我......"小姐你係咪叫左一個 '砵酒煙鴨胸' 走鴨胸?"....真係無名火起, 究竟呢班人知唔知咩0野叫砵酒, 咩0野叫鴨胸! 可能我見識少, 唔知砵酒可以就咁食! 但如果有人食叉燒飯要走叉燒, 我會介紹佢食白飯!....唔該佢地熟讀一下自己餐廳既餐牌啦!!....
最後, 呢碟 '砵酒煙鴨胸' 0黎左, 但我地都已經食到一半, 突然又送多一碟過0黎, 我地話已經食緊, 阿侍應似乎仲要唔信我地食緊果碟就係鴨胸, 反問我地" 真係0黎左啦咩?" 唔通佢覺得我地食緊果碟係叉燒??
最後埋單無cash要碌卡, 點知收銀員皺晒眉, 原來佢將碌卡機0的紙倒轉左入搞到部機郁唔到, 眼見收銀員不斷地皺眉頭仲要"唧唧"聲咁嚮螢幕亂按,.....結果最後仲整short左部機碌唔到卡! 碌卡都俾人埋怨! 唉......
真係食到一肚氣!
