1．餐前飲品／餐後甜酒：細路要咗汽水，大人揀咗餐後甜酒，因為個餐有紅
酒送，我地先飲紅酒。
2．自助沙律吧：好多款食物揀，比較出色有青口，凍蝦和煙三文魚，沙律可自己配上唔同沙律醬，餐湯有兩款，同時，每枱都有蒜茸包，新鮮焗出黎，真係非常得，亞女叫我返屋企整比佢食，問左服務員Ｄ蒜茸包點整，原來用左八款香料黎一齊焗，嘩！响屋企點整呀？咁好味嘅蒜茸包，仲即刻落多一個柯打，我地趁熱食清哂。
3．主菜：食左約半個鐘沙律後，服務員過來講解點樣食石燒，都介紹得好詳細，要我們要記住密密反轉，蝦要煮耐Ｄ，有薯菜和醬汁自由配搭，仲有圍裙比我地，唔駛驚整污糟件衫。好明顯石燒比精選晚餐來得精彩，始終自己落手煮梗係好味Ｄ，尤其是大蝦，真係好大隻，有蝦味又彈牙，鮑魚都唔錯，小牛排比牛柳的味道較好，好有肉味，值得推介！亞女話下次再嚟嘅話都要叫石燒，真係好好玩。
4．自助甜品：有Cheese Cake, Tiramisu, Mousse, 布甸和生果等，味道唔錯喎。不過，食到呢道已經好飽，唔係每款都有試過。
5．咖啡／茶：服務員教用甜酒溝落杯咖啡度好飲Ｄ，又無介紹錯喎，Ｄ甜酒帶出咗咖啡香味，以前真係未試過咁飲法。
其實，個餐真係幾抵食，平時食開Set都有餐湯，沙律，主菜，甜品和飲品，依家連餐前飲品又有，紅酒又有，聽服務員講一日前四位訂座仲有蛋糕送添。
