首先上嘅係日式炸雞同埋和牛他他其，呢個日式炸雞唔會太多炸粉加上調味好夠，就算我唔點沙律醬，都食到好香口嘅炸雞味。至於另外個和牛他他其，就俾到我小驚喜，就係佢塊和牛夠晒軟同埋稔，加埋面頭嗰少少黑松露醬同蔥花，非常之容易入口。
個三色刺身盤就有三種唔同嘅魚刺身，包括三文魚，吞拿魚。
跟住就嚟到重頭戲，石燒日本和牛！首先每一舊和牛都好夠厚度，第二就係呢度嘅侍應哥哥會好好服務咁樣拎塊石板過嚟，介紹完一輪，再親自幫我地燒。去到咁上下時候，仲會叫我地快啲影相打卡，呢個服務一流呀。每一舊和牛嘅厚度都好平均，我哋揀咗七成熟，咁外面就可以食到石燒嘅香味，入邊比較生嘅部份仍然可以鎖住肉汁。舊和牛夠晒鮮味，就算唔點調味醬汁，原汁原味食都夠晒和味，10分推介。
跟住就食海鮮鍋物有scallops，海蝦，蠔，同埋蜆。食海鮮鍋都唔算特別，最特別係食完海鮮鍋之後記得要同侍應哥哥講，因為仲有一個鍋物雜炊，即係用海鮮鍋嘅湯底煮成嘅一碗粥。佢哋會好有心機咁樣先幫你過濾晒所有嘢食，確保只係剩返湯水，先會拎黎煲粥，之後仲會加一隻蛋落去，食落去除咗有齊晒頭先海鮮鍋湯底嘅鮮味，仲有蛋香味，呢一個食法真係好有創意而且好吸引我呀。
食咗咁多嘢，返去一定重咗十幾磅。
