因為時間尚早，所以都唔係好多人，好快有位入坐！餐廳環境寧靜，燈光幽暗，好有氣氛。顏色以藍色為主，好配合餐廳名稱藍象，而且亦顯得餐廳好高貴的感覺！而菜式種類亦都非常豐富，每款都想食，無奈個肚的容量係有限的。
先有泰國皇家宮殿蒸餃子，一藍一白雀鳥的造型得意又精緻，可以一口一個，皮又薄又煙韌，肉餡有淡淡的冬陰公味，都幾特別，值得一吃！
脹卜卜的脆皮青咖哩雞及蝦肉黃金包，只係賣相都夠晒吸引。炸至金黃色的外皮，咬落卜卜脆，黃金包內的雞及蝦肉非常結實飽滿，而且肉餡帶有青咖哩的味道，好有泰式風味！
熱辣辣香脆又可口的香茅炸蝦餅，小小的蝦餅炸到剛剛好，並一開二方便食用，而且口感彈牙，每一口都有淡淡的香茅味。
辣椒蒜蓉炒蝦仁蘆筍，成個菜炒得好夠鑊氣，味道又香。蘆筍清甜爽脆，切成一片片方便食用，蝦仁大隻，肉質結實又彈牙，加上用辣椒蒜蓉炒，非常惹味開胃，配白飯食就正了。
食泰國菜點會唔點我最喜歡食的金邊粉，所以就叫了這個燒大蝦炒金邊粉。
隻蝦好大隻，啖啖肉，而且燒得幾香。而金邊粉炒得好乾身，唔油淋淋，味道甜甜地加埋辣椒乾碎及花生碎，就夠晒惹味。
2
雖然已經好飽，但點都要食呢個甜品黑白糯米飯配泰國芒果。賣相非常精緻，色彩豐富。黑白糯米飯造成手握壽司咁放在一片薄薄的芒果上，方便食用。紫糯米飯就比較乾身同硬，相反白糯米飯軟硬適中，好有嚼口，而且吸收晒啲椰汁，食落充滿椰香味。而糯米飯上仲加有芒果漿、椰漿及炸椰絲，令成個糯米飯更好吃！啲泰國芒果淨係食到甜味，一啲酸都沒，好甜，而且口感好滑沒渣仲好juice。最後食埋個香濃朱古力雪糕球，今餐就perfect了。
