小店以新派韓國料理為主，由前菜、主菜至甜品都有，亦有酒精類飲品提供。
▼韓式炸雞三款口味 ($168)
炸雞三款口味分別為芝士、甜醬油、甜辣。炸雞炸漿不會過厚，雞皮炸到脆卜卜，肉質夠嫩滑，個人最欣賞甜辣口味，另外芝士醬亦好滑溜，每舊雞都沾滿晒醬汁，好好味！
▼一舊seoulmate下的泡菜炒飯 ($128)
呢個咁Cute嘅白雲，每日限量供應，係白雪雪嘅蛋白泡泡雲入面係泡菜炒飯，另外可選意粉或者麵，材料包括好多泡菜粒、豬肉粒，仲有一隻流心蛋黃，全部撈勻之後，雖然整體偏濕，但味道非常之好，絕對係睇得又食得！
▼雞扒軟骨和菠蘿柚子漢堡配炸甜薯條 ($98)
特別嘅漢堡包，雞肉漢堡扒入面可以食到一粒粒軟骨，增加口感 ，不過始終雞肉無牛肉咁Juicy，如果希望食到肉汁嘅朋友就可能會失望。麵包塗上柚子蜜醬，烘得香脆，兩大片菠蘿燒到微焦，超juicy，夾埋蕃茄同生菜，成個包豐富又好味！甜薯條份量好多，甜度適中，如果再脆啲就更好。
▼韓國荷蘭寶寶班戟配焦糖同雪糕 ($62) 薄身班戟充滿蛋香，點埋焦糖同雲呢拿雪糕一齊食，甜得嚟唔會過膩。
▼熱朱古力奶烤自家製棉花糖 ($52) 朱古力奶上面嘅棉花糖極甜！單食可能會過甜，但如果撈勻係下面較淡味嘅朱古力奶就會岩岩好！但整體嚟講，呢杯都姆飽肚同漏，如果想食多啲野就唔建議點。
小總結：整體來說服務同食物質素都唔錯，特別係個嚿食得嘅雲，通常可愛嘅野都係好睇唔好食，不過呢度就相當唔錯！唯一問題係店內嘅冷氣機好似不時滴水，坐唔坐中就睇你彩數！
