麗姐茶餐廳 (Closed)

有人話茶餐廳係港式文化嘅代表。但茶餐廳都有唔同style嘅。所謂咸魚青菜，各有所好，個人就對一啲舊舊的、地踎感濃嘅港式食肆比較偏愛。由佢門面未裝修，就已經行過麗姐無數次，但偏偏次次唔係已食飽就係趕時間，一直無機會坐入去。今日lunch hour行過，啱哂，嚟個佬飯先！有A、B、C、D、E、F、G咁多款午餐，由蒸鯇魚，到涼瓜排骨到印尼炒飯都有，值得留意係是日午餐仲可以做B、C雙拼-即係涼瓜排骨拼滑蛋牛肉，變咗兩餸飯，都只係加兩蚊啫！佬飯少見嘅玩法，但都唔錯喎！焗嘢系列，往往令人無可抗拒。今日揀咗焗肉醬意粉，加杯熱飲都係43大洋，仲送一大碗合掌瓜湯。有時食焗嘢，等十年都唔嚟，嚟到一食又發現外熱內冷，令人好沮喪⋯⋯但喺呢度完全無呢個問題，焗意粉比想像中嚟得快，面頭嘅芝味香噴噴，肉碎都十分足料，叉到入核心內圍都係熱辣辣的。讚！喺呢個時候，廚房部stereo傳嚟汪阿姐〈萬水千山總是情〉嘅歌聲。雖然舖仔細細，但嗰種地道風味，街坊街里情懷，滿載。