佢嘅二人餐非常豐富，兩個人根本冇可能食得晒😆首先係涼菜，堂切垛子牛肉及燴拌濰坊鮮蘿蔔皮，呢個係牛肉整成嘅牛肉凍，切成一片片，沾上少少辣椒粉，非常惹味，而蘿蔔皮非常爽口，既開胃又解膩🥰
之後上湯--松茸清湯雞豆花，呢個湯真係第一次飲，上面浮起嘅叫雞豆花，口感非常特別，湯好清👍🏻之後就係最期待嘅魚籽醬烤鴨配煎餅，師傅成隻鴨推出嚟，好工整咁切咗兩片，加入黑魚籽醬，放上好特別嘅煎餅，佢嘅鴨係唔需要加烤鴨醬已經好夠味，一啖咬落去，層皮脆到，啲油脂香到😍下次去，我要一個人食半隻烤鴨😆
之後上熱菜，成都青花椒毛血旺同埋海捕大蝦燒膠洲白菜，毛血旺好足料，而且好入味，半麻半辣，真係好惹味。而呢份燒白菜有驚喜，比上年喺青島食到嘅更好味😍尤其啲白菜，非常甜。
最後上主食--慕斯大油條（腐乳慕斯/鳳梨慕斯）同埋拇指生煎包，呢份大油條真係大到，一圍枱都夠食，亦都非常特別咁俾兩款慕斯當醬搽落油炸鬼度，個人就比較鍾意鳳梨味，比較解膩。而一粒粒嘅生煎包就煎得好香脆。食完之後仲有阿胶丝滑酸奶解膩，用呢份加入阿胶黑糖醬嘅酸奶做ending真係好合適。
餐廳環境好靚，到處都有京川嘅元素，忍唔住影咗好多相。平日午餐時間去基本上都坐滿，而且大家都提前book定位，相信好多熟客，下次同朋友食飯我都會推薦食呢間🥰
