初頭有啲猶豫，因為我對豬潤嘅要求特別高，驚唔好食出事 👉🏻👈🏻但係見店員真心推介，天氣又凍凍地，好啦，一於叫返碗湯飯改米粉試吓啦！
上菜好快，一嚟到＂嘩＂咗聲，足料又大碗！
但睇睇下，咦？原來變咗湯飯唔係米粉⋯同店員講，佢第一時間話唔好意思搞錯咗
原本佢想成碗拎走換過，但係我覺得太浪費。之後店員好窩心咁另上一份米粉，仲要講咗好多次唔好意思，好有禮貌、好貼心呀
服務態度加分之餘，最緊要係真心好食！豬潤超爽滑，枸杞鮮嫩，加埋少少薑絲，冇咗平時豬膶枸杞嘅腥味，好好食！湯底濃郁，KO咗成碗，成個人暖笠笠
終於搵到好食嘅豬潤啦！
之後再上埋鹹雞，食咗一啖，就明白點解佢係鎮店之寶之一
份量多，雞肉勁嫩滑，鹹度啱啱好，鹹味仲食到雞味，蔥油食落聞落都好香，不過我覺得就算唔點都夠晒味啦！
期待下次試埋佢嘅醉雞～
