入到去，啲姐姐好熱情招呼我哋，個個都有笑容，好有禮貌，氣氛好好，着晒好有特色嘅衫，好有儀式感，令到我哋覺得佢哋好尊重呢個活動，其實有冇豬肉送已經唔重要，睇到個氣氛已經提供到情緒價值，而且個大堂仲有人唱卡拉OK，又有人喺度跳舞，我哋雖然冇一齊玩，但都覺得好有氣氛好開心
另外上菜好快，而且夠熱，開頭以為佢哋整定嘅，但係食落好似真係即刻整嗰隻，好夠火候，估唔到佢哋咁有效率之餘都可以整到啲嘢咁好食，重點仲要係平，唔係話兩舊豬肉就鋸你一頸血，完全冇強迫過你食啲貴價嘢，不過我哋平時食嘢都係散叫多，因為唔想啲套餐有啲唔想食嘅夾硬因為個價錢去叫，我哋都係想食啲我哋想食嘅嘢，咁啱嗰啲孖寶都係我哋想試嘅，價錢又唔太貴，就抱住試吓嘅心，去品嚐
網上面睇人講嗰啲評價真係攞嚟參考，實質真係要自己試吓先知道係咪真係咁差，我之所以打依篇嘢出嚟係因為，我抱住一個唔好食唔抵食，就下次唔嚟，反正都係試一次，但實在真係喜出望外，估唔到又有服務又有味道
我哋平時食開都係咁上下價錢，最緊要食得開心，因為冇理由我哋消費食嘢仲要睇人面色㗎？如果又貴唔好食更加唔會嚟啦。其實我對中式酒樓冇咩好感，但係見啲酒樓好多都執笠，越嚟越少，就開始想試吓啲傳統酒樓粵菜，我對酒樓嘅感覺多數都係星期六日陪阿爸阿媽去食，因為細個冇得揀，夾硬要同佢哋食，所以冇咩好感，但係人大咗會發現去酒樓食嘢更多係一種情懷，一種陪伴，有啲嘢係冇咗就冇咗，香港啲酒樓越執越多，聽講又大陸預製菜又整定嘅服務又差又貴又唔好食，但係我印象中其實又唔係咁差，而我對上一次同爸爸媽媽去食，我都唔記得咗幾時了，我男朋友咁啱話要去酒樓食，感覺依間酒樓同其他酒樓最大嘅分別嘅係特別有氣氛，啲嘢唔差又唔貴，嘢食固然重要，但係食得開心更加重要👍最重要係多一份特別嘅回憶🥹
3
3
3
3
3
3
3
